رئيس التحرير: خالد البلشي

Loading

أهم الأخبار

د. محمد محفوظ يكتب: حوار مع صديقي الـ «سيساوي»

 

- إنتوا عايزين تولعوا البلد .

جملة أرسلها لي أحد الأصدقاء علي البريد الخاص بحسابي على الفيس بوك .

رديت عليه وسألته : إحنا مين ؟

- إنتوا اللي مش عاجبكم العجب ومش عايزين تدوا فرصة للرئيس عشان يشتغل .

- متهيأ لي أنا آخر واحد تقوله الكلام ده ، لأنك لو قريت مقالي : لماذا أريد السيسي رئيسا . اللي كتبته قبل انتخابات الرئاسة ، حتعرف إني دعمت السيسي وبقوة لإني كنت شايف فيه أمل كبير لمصر . وممكن تقرا المقال على اللينك ده :

http://elwadynews.com/د-محمد-محفوظ-يكتب-لماذا-أريد-السيسي-رئيساً

 

- من غير ما اقراه ، إيه اللي عمله الرئيس يستدعي نقده والهجوم عليه.

- والله النقد والهجوم على السياسات مش علي شخص الرئيس أو أي مسئول تاني ، لأن الأمر مش شخصي وإنما يتعلق بمصلحة البلد . وبالتالي المشكلة مش بس في اللي بيعمله الرئيس ، لكن في اللي ما بيعملوش ، وممكن تقرا مقالاتي بخصوص ده على اللينكات دي :

مقال : السيسي ونقص القادرين على التمام

http://albedaiah.com/articles/2015/05/20/89730

مقال : الرئيس .. قائد سياسي أم مصلح اجتماعي

http://albedaiah.com/articles/2015/12/24/103200

مقال : دسترة السيسي لترتيب أولويات مصر .. فريضة برلمانية

http://albedaiah.com/articles/2015/12/19/102819

مقال : حلم الرئيس وأحلام المصريين

http://albedaiah.com/articles/2015/11/02/99592

 

- من غير ما اقرا كل ده .. إيه اللي ما بيعملوش الرئيس ؟

- هو حضرتك مش عايش معانا في البلد .. قول لي إيه اللي اتغير في مصر ، كله على قديمه ، نفس المشاكل من غير أي حلول .

- لأ طبعا ، اتغيرت حاجات كتير ، أنت مش شايف المشروعات العملاقة : قناة السويس الجديدة ، والعاصمة الإدارية الجديدة ، ومشروع المليون ونص مليون فدان ، ومشروع ميناء شرق التفريعة ، ومشروع الضبعة النووي ، ومشروع الــ 3 آلاف كيلومتر طرق .. كل ده مالوش سعر عندكوا .

- لأ طبعا ، له سعر وشايفينه بس مش فاهمينه . أولا الاسم الصحيح هو التفريعة الجديدة لقناة السويس ، لأن قناة السويس لسه فيها أماكن مش مزدوجة زي مدخلها من ناحية السويس ومخرجها من ناحية بورسعيد . وبالتالي اسم قناة السويس الجديدة اسم فيه مبالغة ومش مظبوط . وبعدين عفوا إحنا ما قمناش بالثورة عشان قناة السويس تتوسع ولا عشان يبقى المرور فيها رايح جاي . أما بقى المشاريع التانية اللي بتتكلم عليها ، فكلها في ميزان الأولويات ، وبكرر تاني الأولويات مش الجدوى؛ كلها أقل في الأهمية من مشاكل كتير موجودة وبتبهدل المصريين كل يوم .

- وإيه المشاكل الكتير دي .

- والله باعتبار حضرتك مصري ، أكيد شايف الهنا اللي إحنا عايشين فيه ، ما بين محليات فاسدة ، وزبالة متلتلة ، ومباني مخالفة ، وأسعار مولعة ، واحتكارات تجارية وصناعية ، وفوضى مرورية ، وجهاز إداري للدولة واقع ، وتعليم بايظ ، وصحة فشنك ، وقضاء سلحفائي ، وأمن رجع بوشه القديم .. و .. و .. الجراب مليان ، بس أنا مش حاوي .

- ياسلام .. ليه طيب ما اتكلمتش عن اختفاء طوابير العيش ، وعن السلع اللي الناس بتبدلها بنقط العيش ، وعن حل أزمة انقطاع الكهربا .

- أولا قصة طوابير العيش اللي اختفت مثال بيأكد كلامي مش بينفيه ، لأنه بيدل علي أن ترتيب الأولويات لو كان صح حيفرق بالفعل مع الناس . حل مشاكل الناس اليومية هو المفتاح الأول للتقدم والطلوع بمصر والمصريين لأدام . وبالتالي اشمعني حليت أزمة العيش بالتكنولجيا وسايب مشاكل تانية كتيرة من غير أي حل . أما قصة الكهربا فجزء كبير من حلها معتمد على إن سعر البترول نزل الأرض ، وبالتالي ده خلانا نشتري الكميات المطلوبة لتشغيل المحطات بأسعار أقل ، وحصل وفر خلانا نقدر نصرف على الصيانة وعلى إنشاء محطات جديدة ، وبالتالي الأمر مش معجزة ولازم نصارح الناس ، مش نضحك عليهم عشان نخدعهم بإنجازات وهمية .

- والله الرئيس مش حيعمل كل حاجة لوحده ، الرئيس مش بينام وبيشتغل . لكن الشعب مهمل وكسلان وعايز يقبض فلوس ويأنتخ . وفي الآخر تنتقدوا الرئيس وناسيين الشعب . لازم كل واحد فينا يبدأ بنفسه والبلد حتبقى كويسة .

- للأسف المنطق اللي بتتكلم بيه مغلوط . ولو كانت مشاكل البلد حتتحل لو كل واحد فينا بدأ بنفسه يبقى إحنا مش محتاجين رئيس ولا حكومة . الحكومة هي اللي بتقود التقدم في أي بلد ، وهي اللي بترسم الخطة وبتحط السيستم والشعب بيلتزم بيهم ، واللي ما يلتزمش يتجازى . وبالتالي لو لقيت شعب مهمل أو كسلان أو مأنتخ فاعرف إن العيب عند الحكومة مش عند الشعب . ومتهيأ لي أي مصري مننا بيسافر بره لأوربا وأمريكا بيلتزم بالقانون والنظام ، لأن البلاد دي فيها حكومات شايفه شغلها ، وحاطة سيستم كويس قابل للتطبيق والمتابعة .

- طيب ماهو الرئيس مش لاقي كفاءات في البلد ، يجيب يعني وزرا ومحافظين من المريخ .

- ياراجل اتقي الله ، بلد فيها  تسعين مليون الرئيس مش لاقي فيها كفاءات . المشكلة مش في الكفاءات لكن في معايير الاختيار ، اللي بتخلي الرئيس يختار من نفس الصندوق القديم اللي استوطنته الميكروبات والحشرات ، ومش بيخرج منه إلا عاهات إدارية وتحف سياسية . وبالتالي عيب أوي إن إحنا نعيد إنتاج أسطورة الرئيس العبقري اللي مش لاقي حواليه غير شعب متخلف ومسئولين معتوهين . مش مطلوب من الرئيس يكون عبقري لكن مطلوب منه يدي العيش لخبازه ، ويعتمد على أهل الخبرة والكفاءة مش أهل الثقة والحظوة ورفاق السلاح .

- يعني أنت كده فشفشت الرئيس ، ومش فاهم من كلامك غير إنك عايزه يمشي وما يكملش مدته ، وتقوم ثورة جديدة وندخل في دوامة من جديد . أنت قلبت إخوان ولا إيه ؟

- لو سمحت مافيش داعي لخلط الأوراق ، مين قال إني بطالب بأن الرئيس يمشي أو تقوم ثورة تالتة . الثورة مش لعبة دي انفجار شعبي خطير . أنا بطالب إن الرئيس يعيد ترتيب الأولويات عشان تتحل مشاكل المصريين المزمنة . بطالب إن الرئيس يختار مسئولين ينفذوا سياسات لخدمة الناس مش بينفذوا تعليمات لإرضاء الرئيس . أما قصة إني قلبت اخوان ، فأرجو عدم التخوين ورمي الناس بالباطل . وممكن تقرا مقالاتي وتشوف مداخلاتي في بعض البرامج التلفزيونية في عز سيطرة الإخوان علي كل السلطات ، عشان تعرف إن العبد لله والإخوان لا يجتمعان ، ودي اللينكات لو مهتم تعرف وتشوف :

مقال : الديكتاتور الجديد

http://elbadil.com/2012/08/13/59375/

مقال : الشيفونية الثورية وتمهيد الطريق لأعداء الديمقراطية

http://elbadil.com/2012/07/31/57540/

مقال : دكتور مرسي .. مستر إخوان

http://elbadil.com/2012/07/19/56174/

مقال : التتار الجدد وإرهاب الآخر

http://elbadil.com/2012/07/15/55537/

مقال : أفشل رئيس في العالم

http://albedaiah.com/node/26611

مقال : الإخوان الفاشلين .. وحانوتية القوانين .. وتصفية الثورة

http://albedaiah.com/node/7525

مقال : هم الخارجون عن شرع الله

http://albedaiah.com/node/1450

مشاركتي فى برنامج الصورة الكاملة بقناة أون تي ڤي بتاريخ 23 / 11 / 2012م ؛ حول الإعلان الدستورى الجديد وقانون حماية الثورة .. في مواجهة القيادي الإخواني : حلمي الجزار .

http://youtu.be/ZRSVAUGEPvU

مداخلتي فى برنامج العاشرة مساء بقناة دريم بتاريخ 25/6/2013 لفضح وإجهاض مخطط الإخوان المجرمين للقبض على الحلقة الثانية من النشطاء بحملة تمرد والحلقة الثانية من النشطاء بالحركات المعارضة وفرض الإقامة الجبرية على عدد من رموز الإعلاميين المعارضين .

http://youtu.be/O1jLNFohXNQ

 مشاركتي ببرنامج الصورة الكاملة بقناة أون تي ڤي بتاريخ 26/5/2013 ؛ حول قرار المحكمة الدستورية العليا بأحقية ضباط وأفراد الشرطة والجيش فى التصويت . في مواجهة القيادي الإخواني : سعد عامر .

http://youtu.be/MjwMMIH5wqE

 

- قلت لك كذا مرة مش عايز اقرا ولا أشوف .. وعلى العموم مجلس النواب حينعقد كمان كام يوم ويبقى يقوم بدوره الرقابي والتشريعي ، واللي المجلس شايفه مش عاجبه يغيره .

- ياراجل أنت مصدق اللي أنت بتقوله . هو لما الحكومة تعمل نظام إنتخابي معقد يخلي الناس من حيرتها تزهد في الانتخابات ، ويخلي المحسوبين علي الحزب الوطني وأعداء الثورة يرجعوا تاني للمجلس ، ولما الحكومة تسمح لأجهزتها الأمنية إنها تعمل تربيطات في الضلمة مع قائمة بعينها وأحزاب بعينها ومرشحين بعينهم ، يبقى ده مجلس نواب بتاع الشعب ولا بتاع الحكومة . المجلس للأسف في معظمه ناسب خلاص الحكومة وبقوا من قبل ما ينعقد قرايب .

- يعني أنت لا عاجبك رئيس ولا حكومة ولا مجلس نواب . ده أنت بقى ضد الدولة وعايز بجد تهدها ونبقى زي سوريا وليبيا واليمن .

- لأ .. لو سمحت خد بالك من كلامك .. أنا بالضرورة وبالحتمية مع الدولة ، لكن مش بالضرورة ولا بالحتمية مع النظام . واللي ما يعرفش الفرق بين الدولة والنظام تبقى المشكلة عنده . أنا بعارض وبنتقد السياسات الفاشلة والإجراءات العقيمة والاختيارات السقيمة ، وكل ده عشان مصلحة الدولة . اللي بيهد الدولة هو اللي بيبقى شايفها داخلة في الحيط أو نازلة في ترعة وساكت ، لأنه بيقول أصل الرئيس واخد باله  . لأ .. إحنا مسئولين أدام ربنا إننا نقول للي بيسوق خد بالك أنت داخل بينا في الحيط ، خد بالك فيه ملف . سواء كان واخد باله أو مش واخد . لأن كلنا راكبين عربية واحدة ولو اتقلبت ولا خيشت في الحيط مش حيتأذي السواق لوحده ، لكن كلنا حنتبهدل معاه . أما فزاعة إننا نبقى زي سوريا وليبيا واليمن اللي بتخوفوا بيها الناس فمش حتحصل ، لأن البلاد اللي فيها جيوش طائفية وقبلية هي بس اللي بتقع ، لأن الجيش فيها بينقسم وتحصل فيه انشقاقات . والحمد لله الجيش في مصر وكمان في تونس مش مبني على اعتبارات طائفية أو قبلية ، وبالتالي بإذن الله الدولة ثابتة وزي الحديد ، بس نتمنى تكون حديد لينا مش علينا .

- طيب .. يعني أنت عايز إيه دلوقتي ؟

- عارف ، لو كنت مكان الرئيس كنت عملت إيه ؟ كنت بمجرد انعقاد مجلس النواب أقيل الحكومة وأطلب من حزب الأكثرية اللي هو حزب المصريين الأحرار تشكيل حكومة ائتلافية تنال ثقة المجلس . وبكده أشرك معايا في إدارة البلد كل القوى السياسية وما أشيلش الشيلة لوحدي . لكن للأسف الرئيس في الغالب مش بيفكر بالأسلوب ده . وبالتالي اللي بيشيل لوحده عليه يقبل إنه يتحاسب لوحده ، لأن كل سهام النقد مش حتلاقي غيره .

- أنا مش مقتنع بكل الكلام اللي بتقوله ده . لازم كل الخيوط تبقى في إيد الرئيس ، لأن هو اللي رجّع الروح لمصر والمصريين بعد الإخوان المجرمين ما خطفوا الثورة ، وكمان هو اللي رجّع للدولة هيبتها .

- طبعا .. التاريخ حيسجل دور السيسي في إنقاذ مصر من حكم عصابة الإخوان ، بس للأسف لغاية دلوقتي ما خدش أي خطوة عشان يخلصنا كمان من عصابة مبارك . وطبعا كمان التاريخ حيسجل للسيسي إنه أعاد الروح لمصر ، لكن مش كفاية تعود الروح لوحدها لازم كمان عودة الوعي . روح من غير وعي تليق بجماد أو نبات أو حيوان مش إنسان . وطبعا مهم جدا إن الدولة عادت لها هيبتها وجزء من الفضل ده يرجع إحقاقا للحق للرئيس عدلي منصور ، ولكن السؤال : هو ماينفعش تعود كمان للمواطن هيبته .. هو لازم تكون هيبة الدولة علي حساب هيبة المواطن !!

- والله الرئيس بيعمل اللي عليه ، وربنا إن شاء الله مش حيخذله .

- يارب آمين ، بس أنا مش عارف ليه كل ما أعبر لك عن قلقي على مصر وشعبها ألاقيك أنت قلقان على الرئيس . أنا مشغول بمصر والشعب المصري مش الرئيس ، وده الفرق بيني وبينك ، إن حبك للرئيس أكتر من حبك لمصر . مصر هي اللي تهمني . وعشان كده أيدت الرئيس عشان مصر  ، ومافيش مانع أنتقده وأعارضه برده عشان مصر .

- تحيا مصر ..

- طبعا تحيا مصر .. يعني أنت موافقني .. وﻻ قصدك تقول يحيا الرئيس باعتبار إنك شايف الرئيس هو مصر ؟

- تحيا مصر ..

- ايوه .. يعني إيه .. أنت علقت ولا هنجت .. ولا إيه .. ؟!

- تحيا مصر ..

- ماشي ياعم السيساوي .. تحيا مصر .. تحيا مصر .. تحيا مصر .... وكل واحد بقى ونيته ..

****

dr.mmahfouz64@gmail.com

التعليقات
press-day.png