رئيس التحرير: خالد البلشي

Loading

أهم الأخبار

خالد حمزة يكتب: عننا .. وعن اللى - لامؤاخذة - جاب ورا ؟!

يذكرك هو وأمثاله من عينة عكشة وصاصا والواد والبت؛ والقائمة اللى بقت زى الهم على القلب؛ بزكي قدرة وهوواحد من الانتهازيين الآكلين علي كل الموائد؛ أتباع نظرية إن فاتك صاحب الكرسي أي كرسي - ولو كان كرسي حمام - أتمرغ في ترابه.

وهما.. ماسكين في شعرة معاوية لغاية ما يجيبوا قرارها؛ ولربما تنفع في يوم من الأيام . وفوق كده جلدهم سميك وبيتقبلوا المدح والشتيمة مع بعض وبصدر رحب . وبدل ما الواحد منهم يقولك: أهو أنت يابعيد لو شتمته ؛ بيرفع إيديه للسما ويقولك: ربنا يسامحك.

وأحيانا يقولك: إحنا النخبة وخلاصة الزبدة؛ وآخر يحلفلك أنهم أكتر ناس حريصين علي حماية الوطن؛ من الإخوان وفلول الوطني والليبراليين واليساريين والتقدميين والرجعيين والشيوعيين والملحدين؛ ومش كده وبس دول كمان عارفين؛ مداخل كل جديد ويدخلوا له منين .

المهم أن هؤلاء من كتر التجربة والمرمطة؛ اللي جابت لهم الملايين في البنوك والشقق والفيلات في؛ التجمع والشيخ زايد دلوقتي وفي مارينا من زمان؛ صدقوا نفسهم. وعشان كده بيعملوا بالمقولة السيد درويشية : لأجل مانعلى ونعلى ونعلى .. لازم نطاطى نطاطى . أما أنا وأنت فمن شعب غلبان غلب الأبل ؛ ومضحوك علينا شافعى ومالكى وأبوحنيفة وأم حنيفة كمان؟! أيوه أحنا شعب أكل منه الزمن وشرب؛ وداق الأمرين من حكام الله ما يسامحهم من كل لون وصنف ؛ أيشى فراعنة على هكسوس على رومان ويونان ؛ ومفيش مانع برده : شوية فرنساوية على أنكليس ؛ وخد عندك كمان مماليك وأنكشارية وعثمانلية على أسر مالكة وعسكر وبتوع الأنفتاح ومحدثى النعمة ؛ وأهل الجماعة واللى بيحترموهم ؛ وكلهم خدوا خير البلاد والعباد .

أيوه أحنا شعب يا ما عانى من الأب والأم والواد وأخوه ورجالة الحاشية ؛ ورجال الأعمال لغاية ماتفرج وكله على حساب صاحب المخل !! أيوه أحنا شعب لسه عنده - رغم ده كله أمل - ومتشعلق فى الدنيا  زى ما بيتشعلق فى أتوبيس ولا مترو ولا ميكروباص ! أيوه أحنا شعب متبهدل أخر حاجة ؛ ولسه دافن راسه فى مشاكل العيال وأم العيال والطلبات اللى مابتنتهيش أبدا ؛ ولسه بيفكر فى أنبوبة البوتاجاز والغاز والميه والنور . أيوه أحنا شعب عايش على أد اللى فاضل من اللى سرقوه !! ولغاية دلوقتى مش لاقى يا حرام اللى يحنو عليه ؛ رغم السبسبة ورمى الرمش والسهوكة !! أيوه أحنا شعب مضحوك عليه وأل يقولك : ده فرق سرعات ! يعنى ريسك 67 حصان؛وأنت ياشعب بجلالة قدرك يا دوبك حصان واحد بس ؟

أيوه أنا وأنت والسامعين مطالبنا وطموحاتنا متواضعة للغاية . مش عاوزين : مليون ونص مليون فدان ؛ ولا عاصمة جديدة ولا تفريعة سويس نتباهى بيها وسط العالم .

أيوه أحنا شعب فقرى للركب أحلامنا على أدنا ؛ يعنى مواصلات أدمية ومعاملة أنسانية واللى بناخده بالتيلة باليمين .. ما يتاخدش منا بالشمال ؟!

التعليقات
press-day.png