رئيس التحرير: خالد البلشي

Loading

أهم الأخبار

د. محمد فتوح يكتب: الهري المفيد

إمبارح إدارة المستشفى اللي أنا شغال فيها هنا في إنجلترا بعتت لكل العاملين في المستشفى أيميل بخصوص الحريق اللي حصل في المستشفى من حوالي شهر

الأيميل بيوضحوا فيه أسباب الحريق وايه اللي حصل أثناء الحريق وإتعاملوا إزاي مع الحريق ده وإتعلموا أيه من الحريق وطريقة التعامل معاه وأيه التغييرات اللي عملوها في نظام المستشفى لغاية لما يتغلبوا على أثار الحريق ده والتوقيت اللي هما متوقعينه عشان تخلص كل التصليحات وترجع كل حاجه لأصلها.

في الإيميل ده كمان قالولنا ايه الإجراءات اللي هياخدوها علشان يتفادوا حدوث حريق مشابه في المستشفى في المستقبل ومين الشخصيات اللي أزاحوها من مناصبها بسبب الحريق والتعامل معاه ومين هيكافئوه عشان نفذ خطة الطوارئ اللي عملينها عشان الحوادث اللي زي دي وهيكافئوه إزاي وفي الآخر بيشكروا كل العاملين على تعاونهم أثناء الحدث وبيتعهدوا إنهم هيعملوا كل اللي هيقدوا عليه عشان الموضوع ده مايتكررشي تاني.

لما دورت إكتشفت إن ده اللي بيحصل لما أي حاجه تحصل في البلد هنا زي حادثه كبيره أو حريقه أو حتى قضية فساد ( آه والله حتى هنا بيحصل فساد ونصب وإستغلال نفوذ وبلاوي ) والناس بتقعد تهري وتتكلم عليها بنفس الطريقه زي عندنا عالفيس بوك وعلى تويتر وفي الجرايد وفي برامج التليفزيون بس كل حاجه بيتصرفوا فيها بنفس الطريقه اللي إدارة المستشفى إتصرفت بيها مع الحريقه.

السبب في كده إن فيه أجهزه في الدوله مهمتها الأساسيه ويمكن الوحيده إنها تتابع الحوادث اللي زي دي وتتحقق فيها وتكتشف المشاكل والأخطاء وتحط توصيات للمسئولين عن مين اللي مفروض يتحاسب ومين مفروض يتكافئ وايه اللوايح أو القوانين اللي مفروض تتغير عشان مايحصلشي الكلام ده تاني ... والمسئولين بدورهم بياخدوا التوصيات دي وبيشتغلوا عليها في الحكومه وبعدين بيفشخوا بعض في البرلمان لغاية لما يوصلوا لحلول ولقرارات بتتنفذ وبتتراقب.

عشان كده الدنيا عندهم ماشيه لقدام ولو حتى ببطء والحادثه مابتتكررش بنفس الطريقه وعلى طول بيتعلموا من أخطائهم ومشاكلهم.

تعالوا عندنا بقى في مصر ... المصيبه عندنا بتحصل مره والتانيه والعاشره بنفس الطريقه وبنفس الإسلوب من غير ماحد يتحاسب ولايتنيل ولا بتتغير لوايح ولا قرارات ولاقوانين تمنع إن المصيبه دي تتكرر .. وكل اللي بيحصل شوية تصريحات إعلاميه بعد الحادثه على طول عشان بس تخزي العين وكام الف ملطوش للضحايا والمصابين وشوية قرارات مابتتنفذش ونفضل كلنا مستنين وعارفين إن المصيبه نفسها هتحصل تاني بنفس الطريقه إن ماكنتش بطريقه أبشع.

العيب مش في الكلام ولا في الهري اللي بنهريه عالفيس ومش هوا ده اللي هيرجعنا لورا بالعكس مفروض الهري ده يكون مفيد جدا لو فيه أجهزه شايفه شغلها وبتدور عالحقيقه وبتستطلع إتجاهات الرأي العام وبتوصل لحلول وقرارات تريحنا وتزقنا لقدام بدل ماتودينا في الداهيه اللي إحنا فيها دلوقتي.

التعليقات
press-day.png