رئيس التحرير: خالد البلشي

Loading

أهم الأخبار

زوجة دومة تشكو للقومي لحقوق الإنسان من سوء الأوضاع في سجن القاهرة: حتى البقسماط منعوا دخوله

أحمد ممنوع من التريض وإذا تحدث معه أحد يسارعون بتكديره.. وقلت لهم «يا جماعه كده هيكلم نفسه ويتجنن»

الأمن يفتش الأهالي 4 ساعات في عز الشمس.. ومفيش سراير للمساجين ولا حتى مراتب وممنوع نجيب مرتبه علي حسابنا

 

ناشدت نورهان حفظي زوجة الناشط المحبوس أحمد دومة، المجلس القومي لحقوق الإنسان زيارة سجن القاهرة، للوقوف على تدهور الأوضاع هناك، وقالت في شكوى وجهتها للمجلس إن إدارة السجن تتعمد ترك الأهالي لساعات تحت الشمس في انتظار الزيارة، ورفض الضباط إدخال الطعام للمساجين أو حتى شراء مراتب على حساب الأهالي لهم.

وفيما يلي نص شكوى:- 

بداية سجن القاهرة مفروض انه سجن تحقيق للمحبوسين احتياطيا مش للصادر بحقهم أحكام وبسبب ده له نظام معين في تنظيم الزيارات وغيره، تسأولني ايه اللي حط احمد فيه اصلا وهو واخد مؤبد وليه اتنقل من سجنه ؟؟ معرفش اسالوا اللوا حسن السوهاجي او محمد خلوصي رئيس مباحث المصلحة

المهم انه سجن قمئ ومتدني في كل شئ,التعامل مع الناس, شكل تنظيم الزيارات, الإعاشة المسموح بدخولها, وضع السجناء فيه بما يشمل وضع الزنازين ولبسهم وكل الحاجات الأساسية اللي مفروض تكون متوفرة لحياة بدائية لأي بني آدم, فمثلا أول مرة أصادف سجن بيتمنع فيه حاجات أساسية زي مثلا فيما يخص الاكل، كل ده ممنوع: الفاكهة,العصائر, الحلويات, اي حاجة شبه البقسماط والفينو والفطائر, اوعي تفكر لا سمح الله تدخل مكسرات ولا شيكولاته تبقي كده بتشتمهم

ليه كل ده ممنوع ايه الحكمة؟

اصل معظمهم جنائيين بيحطوا مخدرات في الاكل ..

..برضه مش سبب تمنع علشانه كل الاكل ده حلل لهم او راقب سلوكهم وعاقب اللي يعمل كده انما هتمنع كل ده عن مساجين ازاي.

 

ما هم معظمهم احتياطي مش هيحصلهم حاجة لو قعدوا كام شهر منغير الحاجات دي يعني...طيب والمحكوم عليهم نعمل فيه ايه ،احمد واخد مؤبد هيقعد طول عمره مياكلش فاكهة وحلويات .

ابقي خليه يجيب من الكافيتريا واللي مش فيها هاتيه انتي ونحاول ندخله "نحاول " طيب نحاول ,الزيارة اللي فاتت اتخانقت علي صينية "كنافة بالمانجة" من لابوار يعني مستحيل يكون فيها مخدرات مثلا وصغيرة وملفوفه بكارتون ,عاوزين تمنعوها ليه ؟ ده فالبوابة اللي برا السجن اللي مفروض تبع المصلحة

الضابط : اصل ادارة السجن جوا مانعة دخول الحاجات دي

انا: ادارة السجن قالتلي اي اكل مسموح، واللوا حسن السوهاجي قال الحاجات دي مبتتمنعش اصلا

الضابط: والله لو ادارة السجن قالتلك مسموح بيها خلي حد منهم يقولي وانا معنديش مانع.

دخلت قلتلهم حد ييجي يقوله

..لا والله مينفعش حد من عندنا يخرج يقوله لو ادهالك هندخلهالك

.. في ايه يا جماعه ده كله علي صينية كنافة دي حاجات مينفعش تتمنع أصلا ،،

.. والله روحي اسالي المصلحة لو هما مش عاوزين كده مكنوش جابوه هنا اصلا "قاصده احمد يعني" .

ساعتين بتجري بين بوابة سجن القاهرة وبوابة تفتيش المصلحة وتتحايل عليهم عشان تدخل "كنافة بالمانجة "وفوق راسهم يفطة كبيرة مكتوب عليها يسمح بدخول الماكولات والمشروبات والحلوي والفاكهة بما يكفي حاجة السجين ليوم واحد.

_فيما يخص اللبس، غير مسموح الا بالهدوم الداخلية ولبس السجن اللي مكتوب عليه نزيل، اللي هو من حاجة شبه الخيش وريحته غاية في القرف ومهما اتغسل الريحة مبتتغيرش، والله لو عرضناه علي نقابة الاطباء هتقول مينفعش لبني ادميين اصلا.

قلت للادارة اللي انا اعرفه ان ده اللبس اللي الدولة موفراه وبما انها بتدعي الفقر ومش معترفه اصلا بحق السجناء بتجيبلهم لبس قمئ مينفعش لحيوانات وبتتيح لهم حق شراء لبس علي حسابهم المهم يكون فيه نفس المعايير "كحلي سادة او ابيض سادة " ايه الجديد بقي اللي اتغير ؟؟ قالي لا "الادارة الجديدة "منعت دخول لبس هو لبس السجن وبس .

 

_الكتب ممنوع والصور الشخصية ممنوع والجرايد عدا القومية ممنوع

" كل ده مخالف للائحة السجون " اللي مفروض بتعامل كل الجرايد المسجلة بالمجلس الاعلي للصحافة نفس المعاملة فمثلا من حقها تمنع الجرايد الاجنبية انما كل جرايدنا مفروض متاحة، الكتب المسجلة برقم ايداع كلها بالقانون متاحة ،الصور الشخصية بالقانون متاحة.

لكن روحوا هاتولنا حد يجبرنا نطبق القانون

الجوابات الشخصية ممنوعه حتي لو هتتقري، ابعتوها فالبريد, ده حقهم باللائحة حقيقي

بس مين بقي يحاسبهم علي ان الجوابات فالبريد بتقعد من اسبوعين لتلاته علي ما تروح حتي لو حطتهم في بريد طرة اللي جنب السجن لان البهوات بيبعتهوها امن الدولة تتقري الاول ؟؟

_مفيش سراير ولا حتي مراتب وممنوع نجيب مرتبه حتي علي حسابنا

_ مع درجات الحرارة دي طلبنا تلاجة تخدم العنبر رفضوا، طلبنا نتبرع احنا بتلاجة للعنبر مش لاحمد بس رفضوا، طلبنا ندخل علي الاقل ايس بوكس يحفظ الثلج اللي بيسيح بعد ساعتين رفضوا مع ان في اكتر من حد معاه فعلا

_احمد محبوس انفرادي , ماشي مش جديدة

انما التريض كمان انفرادي ؟؟ اه واحيانا الزيارة كمان بتبقي انفرادي وممنوع يشوف اي حد او يتكلم مع حد ولو شافوا حد واقف بيتكلم معاه بيتفتش تفتيش مهين ويتكدر.

طلبت منهم علي الاقل يخرج تريض مع الناس رفضوا, يا جماعه كده هيكلم نفسه ويتجنن.

لا حياة لمن تنادي

_متوسط 4 ساعات تفتيش في عز الشمس ومفيش حتى تاندة الناس تتحمي فيها

مش قادرين تنظموا السجون وتصرفوا عليها وتحافظوا علي حياة الناس فيها فضوها ،مقررين تكملوا كده وتحبسوا زيادة اضمنولنا بقي اقل حقوق المساجين واهاليهم

التعليقات
press-day.png