رئيس التحرير: خالد البلشي

Loading

أهم الأخبار

إسراء الطويل تشرح كيف تم القبض عليها «صدفة» في أول تدوينة بعد إطلاق سراحها: السجن مش حرية.. السجن ذل ورعب

إسراء الطويل
إسراء الطويل

إسراء: قبضوا عليا وأنا خارجة من تشيليز مع صهيب.. وواحد كلم حد في التليفون قاله في اتنين معاه كمان.. أجيبهم معايا؟

أنا مش ناشطة ولا إخوان ولا 6 إبريل ومليش علاقة بنساء ولا شباب ضد الانقلاب ومش إرهابية أنا إسراء وبس

 

كتبت إسراء الطويل تدوينة على حسابها على فيسبوك شكرت فيها كل من تضامنوا معها وشرحت تفاصيل القبض عليها وقت خروجها من تشيليز نايل سيتي.. وقالت إسراء إنها كانت بتتعشى مع عمر وصهيب، واللي قبض علينا كلم حد في التليفون قال لوا" يا باشا فيه اتنين معاه كمان واحد اسمه عمر محمد علي وواحدة اسمها إسراء محفوظ اجيبهم معايا؟"وسألني انتي اخت أسماء محفوظ؟!"

وأضافت إسراء الطويل أنا مش ناشطة  ومش إخوان ولا عمري كنت إخوان قبل كدا و مليش أي علاقة لا بـ"نساء ضد الإنقلاب" ولا بـ"شباب ضد الإنقلاب" هي دي الحقيقة ! مش عشان ليا أصدقاء منهم يبقى أنا إخوان ! . و أنا مش 6 إبريل ولا عمري انضميت ليهم بردو ومش عشان ليا أصدقاء منهم يبقى أنا 6 إبريل .

 وتابعت «أنا جيت مصر في آخر 2010 وحبيت التصوير وحاولت اتعلم تصوير صحفي فأتعرفت على ناس كتير وبقى ليا أصدقاء كتير لكنني دايما مستقلة برأيي وما بحبش أكون محسوبة على أي جهة ولا عمري انضميت لأي حزب .أنا إسراء وبس . و أنا مش إرهابية»

وختمت تدوينتها « السجن وحش جدا وبيقتل الحياة، السجن مش حرية ولا حاجة من الشعارات اللي بتتقال دي كلها، السجن ذل وقهر ورعب»

وإلى نص تدوينة إسراء الطويل :

أولا : أنا بشكر كل المتضامنين معايا من منظمات حقوقية وأفراد في كل مكان بالدعاء أو بحرف أو كلمة أو مقال أو فعل ، شكرا جدا فعلا و ممتنة ليكم حقيقي. تم إخلاء سبيلي على ذمة القضية بتدابير احترازية (إقامة جبرية ومبقدرش أخرج من البيت غير بإذن الشرطة و يوم في الأسبوع بروح فيه القسم للمراقبة) يوم 19 ديسمبر 2015 بعد 15 يوم اختفاء قسري و 188 يوم حبس احتياطي . أول امبارح 20/1/2016 كانت جلسة التجديد في قضيتي وتم تخفيف التدابير الاحترازية للمرور على القسم يوم واحد في الأسبوع لمدة 45 يوم حتى الجلسة الجاية . بحاول استعيد صحتي في الوقت الحالي و أعوض الـ7 شهور اللي اتمنعت فيهم عن علاجي .

ثانيا : أنا مش بطلة ولا أي حاجة، أنا اتقبض عليا وانا خارجه من تشيليز نايل سيتي كنت بتعشى مع عمر وصهيب ، واللي قبض علينا كلم حد في التليفون قاللوا" يا باشا فيه اتنين معاه كمان واحد اسمه عمر محمد علي وواحدة اسمها إسراء محفوظ اجيبهم معايا؟"وسألني انتي اخت أسماء محفوظ؟! ومن وقت اصابتي في 25 يناير 2014 و أنا مليش أي علاقة فعلا بمظاهرات ولا أي حاجة بتحصل في مصر عشان أقدر اركز على علاجي لأنني كنت مشلولة تماما في أول اصابتي ولمدة 6 شهور لما بدأت أقدر اقف على رجلي ، فيه ناس في السجن بقالهم سنين ممكن يكونوا هم الأبطال فعلا . و أنا مش ناشطة سياسية ، حد سمع عن أي آراء سياسية قبل كدا ليا ولا شافني في أي إعلام قبل ما يتقبض عليا ؟ . و أنا مش إخوان ولا عمري كنت إخوان قبل كدا و مليش أي علاقة لا بـ"نساء ضد الإنقلاب" ولا بـ"شباب ضد الإنقلاب" هي دي الحقيقة ! مش عشان ليا أصدقاء منهم يبقى أنا إخوان ! . و أنا مش 6 إبريل ولا عمري انضميت ليهم بردو ومش عشان ليا أصدقاء منهم يبقى أنا 6 إبريل . أنا جيت مصر في آخر 2010 وحبيت التصوير وحاولت اتعلم تصوير صحفي فأتعرفت على ناس كتير وبقى ليا أصدقاء كتير لكنني دايما مستقلة برأيي وما بحبش أكون محسوبة على أي جهة ولا عمري انضميت لأي حزب .أنا إسراء وبس . و أنا مش إرهابية ، التهم اللي وجهتهالي نيابة أمن الدولة وحبستني عليها احتياطي هي (الانضمام لجماعة إرهابية ونشر أخبار كاذبة ) و أنا لا انضميت للجماعة ولا نشرت أخبار كاذبة ! مليش علاقة بالقصص اللي بتتقال في الإعلام !

ثالثا : أتمنى قريب كل المظلومين في السجن يخرجوا ويكون فيه عدل، السجن وحش جدا وبيقتل الحياة، السجن مش حرية ولا حاجة من الشعارات اللي بتتقال دي كلها، السجن ذل وقهر ورعب في الحقيقة أتمنى إن أي مظلوم ميباتش ليلة واحدة في السجن .

التعليقات
press-day.png