رئيس التحرير: خالد البلشي

Loading

أهم الأخبار

وائل غنيم يكتب عن أسباب تصعيد ايطاليا: 6 نقاط أساسية بعد يومين من لقاءات الوفدين المصري والايطالي

وائل غنيم
وائل غنيم

غنيم: الجانب الايطالي لم يطلب تفريغ 2 مليون مكالمة في محيط سكن ريجيني في الدقي.. فرقعة مصرية

 

تحدث المدون والناشط وائل غنيم، عن أسباب تصعيد إيطاليا لهجتها مع الحكومة المصرية، مرجعًا ذلك إلى وصول المحققين الإيطاليين إلى عدم وجود أي أدلة على العلاقة بين المقتولين الخمسة و الطالب الإيطالي جوليو ريجيني.

وأكد غنيم، عبر حسابه على فيسبوك، اليوم السبت، على عدم صحة ما نشر حول طلب إيطاليا سجل مكالمات 2 مليون شخص في المنطقة المحيطة بريجيني قبل مقتله، مشيرًا إلى أن ما نشر هو مجرد "فرقعة إعلامية" لإظهار أن الإيطاليين يطالبون بطلبات تعجيزية.

وتحدث غنيم عن بعض متابعات حادث مقتل الطالب الإيطالي، مؤكدًا أن إيطاليا ليس لها أي أهداف سياسية، وأن السفير الإيطالي كان يبذل مجهودًا الفترة الماضية  لتشجيع العلاقات الاقتصادية بين البلدين، مضيفًا أن إيطاليا فقط تحاول معرفة ما إذا كانت الاجهزة الأمنية متورطة في قتل ريجيني بعد تعذيبه.

 

وكتب غنيم:

متابعات مهمة في قضية ريجيني

 (١) السبب الأساسي اللي خلى الجانب الإيطالي يصعد من لهجته مع الحكومة المصرية كان متعلقات ريجيني الشخصية اللي الداخلية ادعت إنها لقيتها في بيت أفراد عصابة سرقة الأجانب بعد ما قتلتهم كلهم تحت ذريعة إنهم مسلحين..

 الجانب الإيطالي من خلال فريق محققيهم وصلوا إن مفيش أي دليل على العلاقة بين العصابة المزعومة وريجيني. وده كان من الأسباب الرئيسية لتراجع وزارة الداخلية عن روايتهم اللي نشروها عبر وسائل الإعلام.

الإيطاليين بعدها سألوا الأمن المصري سؤال مكانش ليه إجابة منطقية: متعلقات ريجيني الشخصية طلعت منين؟ ومن وقتها والجانب الإيطالي مقتنع إن الأمن المصري يعرف قتلة ريجيني وبيتستر عليهم. وبقه عندهم قناعة كبيرة إن جهاز أمني مصري هو اللي عذب ريجيني لحد الموت.

 (٢) في ١٦ فبراير وزارة الداخلية بعتت منشور لكافة فروع الوزارة في مختلف المحافظات بينص على ضرورة إخطار مكتب وزير الداخلية في حالة القبض على أي رعايا أجانب. الخبر ده اتنشر في اليوم السابع وقاله شريف عامر في برنامجه وقال إن الكلام ده منقول من مصدر أمني بوزارة الداخلية اتكلم معاه بشكل مباشر. الموضوع ده فكرني بحبيب العادلي اللي ما انتشرت ظاهرة تصوير ضحايا التعذيب بالموبايل في الأقسام بدل ما يوقف التعذيب قرر يمنع دخول الموبايل للأقسام.

 (٣) اللواء علي عبدالرحمن مساعد وزير الداخلية الأسبق والخبير الاستراتيجي قال في لقاء تلفزيوني مع أسامة كمال إن بدون أي تحيز، ضباط المباحث المصريين هما أكفأ وأفضل ضباط المباحث في العالم. وإن الرأي العام المصري والإيطالي لازم يبطلوا استعجال لأن القضية ممكن تاخد سنة أو سنتين. وأكد إن الواد اللي قتل ريجيني حريف. ليه يا سيادة اللواء؟ لأنه طفى سجاير في جسم ريجيني بعد ما قتله.

 (٤) الخبير الاستراتيجي سعيد اللاوندي اللي هو المفروض شخص مثقف ومطلع، أكد إن القضية لدى القضاء المصري وأن على وزير الخارجية الإيطالي أن يصمت وألا يشارك في المؤامرة على مصر. واستبعد حصول أي ضرر للعلاقة المصرية الإيطالية لأن الحدث فردي ومستحيل مصالح البلدين تتوقف عشان شخص اتقتل ومنعرفش مين اللي قتله.

 (٥) فيه إشاعة منتشرة إن الجانب الإيطالي طلب من الأمن المصري سجل مكالمات ٢ مليون شخص في المنطقة المحيطة بريجيني قبل قتله. الجانب الإيطالي مطلبش الطلب الأهبل ده والموضوع كله فرقعة إعلامية عشان يبان إن المحققين الإيطاليين بيطلبوا طلبات تعجيزية وبيتآمروا على مصر.

 (٦) السفير اللي رجع إيطاليا للتشاور مع حكومته، كان خلال الفترة اللي فاتت بيعمل مجهود كبير لتشجيع العلاقة الاقتصادية بين مصر وإيطاليا. وكان من اللي بيحاولوا يطمنوا رجال الأعمال الطليان عن استقرار الأوضاع الأمنية والسياسية في مصر. وبالتالي إيطاليا عمليا مش بتشارك في حروب الجيل الرابع ولا الخامس ولا حتى التاسع والستين، والقضية وما فيها إنهم عايزين يعرفوا هل أجهزة الأمن المصرية متورطة في قتل مواطن إيطالي على أراضيها بعد تعذيبه حتى الموت ... ولحد دلوقتي مش عارفين يوصلوا لإجابة.

التعليقات
press-day.png