رئيس التحرير: خالد البلشي

Loading

أهم الأخبار

ولاء صلاح تكتب «عاملوني بالمثل»: 7 قصص عن الحب والسفر والسحور والعمل الخيري «كله اعتقال وتعذيب وقتل.. مفيش شتيمة»

في اجتماع «سيادة الرئيس» بما يسمى " لقاء الأسرة ولا مؤاخذة المصرية" قال سياته: أنا لم أخذلكم ولم أتخلى عنكم، ولم أشك لحظة في إخلاصكم يا مصريين، من فضلكم عاملوني بالمثل وعاملوا الدولة بالمثل، شكرا جزيلا". للحظات استوقفنى كلامه ، قعدت اقول لنفسي فيها ايه يعنى لو عاملنا الريس بنفس الشفافيه والمكاشفه اللي هو بيعاملنا بيها  .. وزى ما طلب مننا قبل كده نسمع كلامه هو بس .. هو كمان يسمع كلامنا احنا عن 5 ولا 6 حالات بس من ملايين المصريين المخلصين .. وأهو بالمرة نشوف حكاية بالمثل دي.
 
(1)
بعد المصيبة بتاعت بيع جزيرتين تيران وصنافير متهيألي سامعه أن فى مظاهرات وحركات .. لو اتكلمنا بالمثل.. لو صادفت أي مظاهرات أو وقفات .. ضروري تستفيد من الموقف زى ما عمل «تامر خميس جمعه صباح».
هو جاب عربية شاي على ناصية مول طيبة في ميدان رابعة العدوية .. قبل الفض بكام أسبوع .. في الحتة اللي جنب الميكروباصات كده وقف بالنصبه وقال يسترزق .. قامت جات قوات الأمن تفض الميدان وزي ماسياتك عارف قتلت وشردت وجرفت جثث قد ايه .. المهم .. تامر هرب بعدة الشاى بتاعته .. مصدر رزقه .. لكن العساكر والضباط كسروها وضربوه ورموه فى البوكس .. واترمي فى السجن مش عارف بتهمة ايه .. أهل مراته حكموا عليها تطلق منك لأنها مش حمل زيارات وبهدلة على السجون .. بالعيال ومصاريفهم ومصاريفه .. تامر كان عامل حادثة قديمه وشايل فص كبد ومراته دي شالته كتير .. وحالته الصحية بتتدهور جوه السجن وعمره بيتسرسب .. خليك فاهم محدش هيخرجك من تحت إيد جهاز أمني قرر ياخد عاطل بباطل ويرمي فى السجون.. خليك زى تامر بقاله أكتر من 900 يوم محبوس احتياطى فى قضية لمت زيه كتير .. تحت غطاء (فض رابعه) ومحدش سمع عنه.
(2)
سيبك من الشغل .. أنت تاخد 10 من اصحابك .. أقرب أصحاب لك. وتروحوا تتسحروا فول وطعميه وزبادي فى رمضان الجاي .. هيجي الأمن يهجم ع المكان ويتعدى ويقبض عليكوا ويسرق فلوسك وأجهزة الموبايلات واللاب توب .. وبناء على تحريات متلفقة وبرغم كل الثغرات القانونيه فى القضية ومن غير ما ياخد بشهادة الشهود هيطسك 15 سنه سجن .... وأنت واصحابك الـ 10 اللى منهم دكاترة ومهندسين وناس كل حياتها فى العمل الخيري والتطوعى وناس مالهاش أصلا فى السياسه .. تقضوا أحلى سنين عمركوا وشبابكوا ومستقبلكوا بين أربع حيطان من غير أى ذنب .. ويتحرز الفول والطعمية على انهم مولتوف وكاوتشوك.
 
(3)
طيب بلا شغل بلا أصحاب احنا نحب .. فى الدنيا دى مفيش أبداً أبداً .. أحلى من الحب .. انت تعمل زى الزميل الصحفى عمر عبد المقصود تحب وتقرر تتجوز اللى حبيتها وتخلف منها أحلى عيال .. بس قبل الفرح بأسبوع .. هو هواه نفس الأمن اللى قبض عليك وانت بتشتغل وانت مع اصحابك يقبض عليك برضه .. فاضيين بقى .. اعتقلوا عمر واخوه ابراهيم واخوه القاصر أنس 16 سنه .. وواحد صاحبهم ..  وعذبوهم علشان يعترفوا بحرق سيارات فى ميت غمر، في الوقت اللي قدم دفاعهم شهادة تحركات تفيد بعدم تواجد عمر في ميت غمر من الأساس، بس تقول لمين .. ضاع الفرح ودبلت العروسه والفستان واتحكم على عمر واخواته بالمؤبد .. بناء على تحريات ملفقة ..  لسه عايزنا نعاملك بالمثل؟
 
(4)
طيب استنى بلا شغل بلا اصحاب بلا حب .. جواز علطول .. وأهو نستقر وخلاص .. وكام سنه ويبقى عندك أبن زى المهندس احمد ايهاب محمد النجار الطالب في كلية الهندسة جامعة الأزهر .. لكن قوات الأمن هتهجم على البيت وتخطفه وتخفية قسراً قد 148 يوم من غير ما حد من اهله يعرف هو مات ولا عايش .. ولا حد يفهم المخترع الصغير الخلوق حصله ايه واتعرض لأيه .. لما والدته تلف الشوارع والحوارى والاقسام والمستشفيات يمكن رموه هنا ولا هنا ..وامه اللي مالهاش فى اى حاجه تضطر تعرف طريق السوشيال ميديا وتطلق حمله #ابحثوا_معي للبحث عن ابنها .. وبعد 4 شهور تلاقيه فتفرح فرحة المصريين يوم 11 فبراير 2011 فى ميدان التحرير ..الست مافرحتش بنجاحه ولا جوازه ولا خلفة عياله ..  هى بس فرحت لانه عايش وعارفه مكانه فين؟؟ في سجن طره.
 
(5)
سيبك من عيالنا ماجاش من وراهم غير الهم والضغط .. خلينا فى احفادنا دول بقى أعز الولد .. لو جينا نعامل حفيدك بالمثل تخيل حفيدك ابو 11 سنه ماشي فى الشارع فيتاخد فى مسيره ماشيه في اسكندرية من محطة الرمل في بدايه 2015 وعلشان الحمد لله .. والفضل لك يعنى أولاً وأخيراً .. مفيش مكان فاضي في كوم الدكه للأحداث .. يفضل الولد شهور طويله.. قرابه سنه محتجز في القسم مع الجنائيين اللي علموه شرب السجاير والمخدرات .. فخرج بعد قرار اخلاء سبيله بنى آدم تاني .. بندور له على مركز تأهيل نفسي يتعالج فيه .. يمكن يرجع يفكر في الحياة بدل ما بيفكر في الموت ..و رافض يعيش أو يذاكر أو حتى يتعرض علي دكتور نفسي .. يمكن يبطل يبقى اناني أو يمد أيده على فلوس مش من حقه .. يمكن يرجع أنسان زى ما كان قبل ما تدخل حياته وتحرمه يعيشها.
 
(6)
بص انت تسيبك من كل ده وتاخد المدام وتبعدوا عن حرق الدم ده كله .. وتعملوا حاجه خدميه مجتمعيه بره عن فرشة الشاي والسياسه والعيال والصحاب وتعيش لأعمال الخير .. اعمل لأخرتك .. فالأخرة خير وأبقى .. صدق الله العظيم.  وأهو تشيلوا من على البلد حمل بعض المشاكل .. تشتغلوا مثلاً على تأهيل أطفال الشوارع تبقوا قدمتوا خدمه عظيمة للمجتمع .. زى ما قرر محمد حسنين ومراته آيه حجازي .. تبدأوا بكيان صغير تسموه "مؤسسة بلادي" تعملوا حمله كل وسائل الإعلام تتكلم عنها وتطلع بيها السما تسموها أطفال شوارعنا تقابلوا أطفال الشارع وتتكلموا معاهم وتعالجوهم من تعاطى المخدرات والسرقة وتعملولهم برامج تأهيل ..ولما الداخلية تحطكوا فى دماغها وتقرر تقبض عليكو وتشمع المكان .. وتقرر تشنع عليكوا وتقول كلام غريب زى انكوا بتخطفوا اطفال الشوارع وتجندوهم وتعتدوا عليهم جنسيا و وتجبروهم على التعدى على قوات الشرطة والجيش و تهم من النوعية دى كتير .. وتفضلوا محبوسين سنتين .. من غير أى دليل على كل التهم دي .. أهو هناك بقى فى السجن ..  تقدروا تحبوا بعض أكتر وتجيبوا لبعض ورد برغم السجن والسجان .. بالمثل أهو.
 
(7)
انا عارفه انك زهقت من المعامله بالمثل .. مش بعيد تكون خفت .. احنا نشوف معرض عربيات نأجر منه عربية حلوة ونطلع نعمل Diving  في تيران السعودية .. زى ما اعلانات شركات السياحه بقالها يومين ثلاثه بتعلن يعنى ..
آه بالمناسبه كان فى معرض عربيات فى «رشيد بحيرة» صاحبه اسمه السيد الكسبرى الداخليه راحت تفتش المعرض من غير اذن نيابه فلما سألهم ع الإذن ضربوه بالشوم على جسمه وجردوه من ملابسه خالص وقاموا بسحله في أرضيه المعرض، وبعدين خلوه يمشي قدام الناس عريان علشان يكسروا عينه فى البلد وبعدين خدوه ع القسم لفقوله تهم حيازة سلاح و مقاومة السلطات، وهناك كملوا اعتداء عليه لحد ما مات .. الله يرحمه.
 
_ _ _ _ _ _ _ _ _ _ _ _ _ _ _ _ _
(1) محمد خميس جمعه صباح _ المحبوس احتياطياً على ذمة القضية المعروفه اعلامياً ب(فض رابعه) والتي يحاكم فيها 739 متهما بينهم المصور الصحفي محمود شوكان وعدد من قيادات الإخوان بتهم التجمهر والقتل العمد وتعطيل السير وتكدير السلم العام وغيرها.
 
(2) 11 معتقل عُرفت قضيتهم اعلامياً بمعتقلي السحور بعد الحكم عليهم بالسجن 15 عامًا، استناداً لتهم واهية لهم بناء على تحريات كيدية من جهاز المباحث والأمن الوطني في البحيرة وتجاهل المحكمة شهادات شهود النفي في القضية، الذين أكدوا عدم صحة ما ورد في محضر الاتهام. ووجهت الشرطة اتهامات الانضمام لجماعة الإخوان، إضافة لحريق أحد الشركات السياحية بدمنهور بجانب قطع الطريق وإشعال النيران فيه وخرق قانون التظاهر وحمل لافتات معادية للنظام .
 
(3)عمر عبد المقصود (المصور الصحفي بموقع مصر العربية)، وشقيقيه؛ إبراهيم "بطل السباحة"، وأنس البالغ من العمر 16 عامًا، وزميله عبد المنعم البالغ من العمر 17 عامًا بتهمة حرق سيارات بميت غمر.
 
(4) أحمد إيهاب محمد محمد النجار ظهر من يومين فى سجن طره بعد اختفاء قسري دام 148 يوما .من قبل قوات الأمن التى اعتقلته من منزله بأبو رواش كرداسة جيزة في 13/11/2015ولم يتسنى لذويه معرفة تفاصيل القضية الملفقة له بعد .. يعتبر أحمد ضمن 204 حالة تعرضت للاختفاء القسري، ما يزال رهن الاختفاء القسري 101 حالة منهم، فيما ظهرت 103 حالة، حيث يقوم جهاز مباحث الأمن الوطني في إلقاء القبض على الأشخاص واحتجازهم في مقار الأمن الوطني ومعسكرات الأمن المركزي على مستوى محافظات الجمهورية . بدون سند قانوني واحتجازهم بمعزل عن العالم الخارجي وإخفاءهم . بحسب تقرير للمفوضية المصرية للحقوق والحريات.
 
(5) أمتنع عن الافصاح عن أسم وشخصية الطفل لأسباب انسانيه ومهنيه.
 
(6)آيه حجازى محمد حسنين المحبوسين احتياطياً لعاميين مع عدد من الشباب والبنات المهتمين بالعمل الخيري التطوعي  فى القضية رقم 4252 جنح عابدين والمعروفة بـ قضية " مؤسسة بلادي" .. دون وجود اي اثبات واقعي واحد فى القضية يثبت قيام المتهمين بـ التهم المنسوبة اليهم وتجاوزهم مدة حبسهم والتحقيق معهم المدة المنص عليها قانونياً.
 
(7) السيد السيد الكسبري، 32 سنة، صاحب معرض سيارت لقى حتفه فى 5 مايو 2015 بمركز شرطة رشيد، متأثرًا بإصابته التي أودت بحياته.
 
أخيراً:
 
لو عايز تتعامل بالمثل عيش معانا في بيت مالوش سقف وحيطانه مايله .. شوية مطر يغرقوه ويساوه بالأرض .. أو في قرية مافيهاش صرف صحى والناس بتاكل وتشرب بمية ريحتها وطعمها مجاري وأمراض الدنيا ماسكة فى جتتهم، لف مع جدودنا على صرف المعاشات والتموين اللي بيموتوا قبل ما يصرفوهم .. لف معانا بعيالنا اللي خدوا دوا مغشوش وتطعيم مسموم على المستشفيات .. اكتفى بمرتب 600 جنيه أصرف بيهم على نفسك وبيتك ومرضك ودارسة عيالك وابنك العاجز وبنتك المتطلقه وعيالها. خليك مدني ونحاكمك عسكري .. خليك سلمي ونصفيك جسدياً .. خليك عسكرى غلبان طفحان يرجع لأمه في نعش.
 
ملحوظة : هذا المقال ساخر هزلى غير حقيقى غير موضوعى غير محايد والأحداث الوارده به خيالية و لا تمت للواقع بصلة و أى تشابه بينه و بين الواقع فهو أغرب من الخيال.
 
 
 
التعليقات
press-day.png