رئيس التحرير: خالد البلشي

Loading

أهم الأخبار

مها مكاوي تروي قصة وقفتها أمس للمطالبة بعودة أشرف شحاتة وحصار الأمن لها بالمصفحات: كنت عاوزة أعمل حاجة لجوزي

مها مكاوي
مها مكاوي

مكاوي: كنت حاسة أني عاجزة واعتقال جدعان جمعة الأرض زادني قهر ورفعت يافطة الجدع اشرف محبوس من 27 شهر

قفلوا شارع التحرير وعربيات مصفحه وملثمين نزلوا رفعوا في وشي السلاح وحاوطوني ولا اتهزيت

 

روت مها مكاوي زوجة أشرف عضو حزب الدستور المختفي قسريا منذ 27 شهرا قصة الوقفة الاحتجاجية التي نفذتها منفردة فوق سور محطة مترو البحوث .. وقالت مكاوي في تدوينة على صفحتها على فيسبوك «كنت حاسة أني عاجزة وعاوزة أعمل حاجة لجوزي» واضافت « اعتقال جدعان جمعة الأرض ال 25 زادتني اكتئاب وقهر وحزن .. وقررت فجأة أرفع يافطه مكتوب عليها .. الجدع اشرف محبوس من 27 شهر.. ها مبسوط يا شعب.. و25 جدع محبوسين ضد بيع الأرض»

 

وإلى نص تدوينة مها مكاوي والتي روت فيها كيف تم إغلاق شارع التحرير بعربات مصفحة وتدخل الأمن الوطني بسبب يافطة رفعتها للمطالبة بعودة زوجها :

 

نص التدوينة:

الحقيقه بقالي كام يوم عندي احاسيس مختلطه من حالة حزن لحالة عياط مفاجأ لحالة سكون ممزوج بالقهر وحاسه اني عاجزه اعمل حاجه لجوزي اللي بقاله 27 شهر مختفي

وحالة اعتقال جدعان جمعة الأرض ال 25 زادتني اكتئاب وقهر وحزن ووجع علي شباب بتدافع عن أرضها وبلدها وأكبرهم لا يتعدي ال 20 سنه

حاله غريبه خلتني النهارده فجأة وبدون مقدمات الساعه 6 نزلت وكان عندي اجتماع وقررت فجأه أرفع يافطه مكتوب عليها

الجدع اشرف محبوس من 27 شهر

ها مبسوط يا شعب          

و25 جدع محبوسين ضد بيع الأرض

ووقفت فوق سور محطة البحوث لوحدي وكان معدي بالصدفه صديقي اسلام اسامة اللي انقذني وبعد 5 دقايق من الوقفه لاقيت شارع التحرير اتقفل وعربيات مصفحه وملثمين نزلوا رفعوا في وشي السلاح وحاوطوني وانا واقفه بكل عزة نفس ولا اتهزيت لحظه وكأنهم سراب

وجه ضابط يقولي انزلي علشان اكلمك مش انا اخوكي قولتله اؤمر خير

قالي انتي عايزة ايه

قولتله عايزة جوزي اللي عندكم من 27 شهر

قالي فكرك ورقه زي دي اللي هاترجعه

قولتله الورقه دي قلقتكم ليه أنا لا رافعه سلاح ولا معايا قنبله

قالي طيب انزلي علشان نعرف نتكلم

قولتله مطالبي مكتوبه ومش ها اتحرك من مكاني

طبعا عملوا دايره بالملثمين حواليا وجه تقريبا رائد وقالي طيب انزلي انا لو اعرف اطلعلك ها اطلع انتي طلعتي ازاي

وشويه وجت عربيات ميكروباص وتقريبا امن دوله

المهم بعد كلام ومناقشات قرر ياخد بطاقتي وخدها فعلا

وشويه وجه رئيس مباحث قسم الدقي وقعد س وج ويعمل اتصالاته

وقالي تعالي قسم الدقي نتكلم ولو عايزة نعمل محضر اثبات حاله مافيش مشكله بس نزلي اليافطه دي ونطلع علي القسم

وطبعا كان اسلام صور وشير الصور وجه شباب حزب الدستور اللي ماسبونيش وحاوطوني خوفا احسن اتاخد من وسطهم

ولما قالي تعالي القسم رفض صديقي حازم الزهيري واسلام اسامه انهم يسيبوني وروحنا القسم واتصلت بالجدع قوي حليم اللي جاي مخضوض عليا ومش عارف جرالي ايه واتعمل محضر جديد

انا باعتذر لكل حد قلق وخاف علي وباعتذر ان ماردتش علي كل التليفونات

بس الحقيقه انا مؤمنه اني صاحبة قضيه وصاحبة حق انا تعبت من اللامبالاه لقانون اللادوله

وخاطبت كل المسئولين بكافة المستويات وحتي رئيس الدوله قدمت اكتر من طلب واترفض مقابلته

وبعد معلومات مؤكده من وجود اشرف متنقل بين سجون الداخليه وحبس انفرادي من هنا لهنا لاخر معلومه مؤكده فعلا انه في حبس انفرادي بسجن العقرب وقدمت طلب بزيارته للوا عبدالكريم ولم يتم التعامل بجديه منذ اختفاء اشرف حتي الان

وهااقولها كتير يوم مااتخلي عن جوزي هاتكونوا مكفنيني وبتدفنوني غير كدا وطول مافيا نفس هااطلب بحقه ومش هااسكت

والوقفه دي بدايه وباكررها بدايه لانها هاتتكرر كتير وفي اي مكان

اسفه للاطاله بس حبيت اوضح الموقف كاملا

‫#‏اشرف_شحاته_حابسينه_ليه

‫#‏افرجوا_عن_شباب_جمعة_الارض

  

التعليقات
press-day.png