رئيس التحرير: خالد البلشي

Loading

أهم الأخبار

إسراء الطويل تروي تجربتها مع ثعابين سجن القناطر: عثرنا على ثعبان أسود.. والصراصير والعناكب كانت بتمشي علينا واحنا نايمين

إسراء الطويل
إسراء الطويل

المصورة: العنابر بقت بيئة مناسبة للحشرات .. عرفت من أهالي البنات المحبوسين إن التعابين بقت كبيرة دلوقتي

 

روت الناشطة إسراء الطويل، في تدوينة لها عبر موقع التواصل الاجتماعي، "فيس بوك"، مساء اليوم، الظروف القاسية التي مرت بها أثناء حبسها في سجن القناطر العام الماضي، مشيرة إلى أن العنبر الذي كانت محتجزة بداخله عثرت فيه المسجونات في إحدى الليالي على ثعبان أسود، بالإضافة تجمع الحشرات بكثرة نظرًا لوقوع السجن وسط الزراعات، بالإضافة ارتفاع درجة حرارة العنبر نظرًا لاقترابه من السخانات.

نص التدوينة:

السنة اللي فاتت لما كنت مسجونة في سجن القناطر في عنبر ١ تحقيق زنزانة السياسي في ليلة العنبر المشترك بيننا وبين الجنائيات اتقلب عشان لقوا تعبان ، في المسجونات ناس عرفت تمسكه وحطوه في برطمان عشان يودوه لرئيس مباحث السجن تاني يوم كان لونه اسود وفي طول كف الايد ورفيع ، كانوا بيقولوا انه تعبان صغير واحتمال يكون فيه كبير .. كان حاجه مرعبه جدا بالنسبالنا وكان العادي دايما نلاقي صراصير وعناكب ماشيه علينا خصوصا واحنا نايمين.. بسأل اهالي البنات هناك الواتي قالولي ان السنادي بقى فيه تعابين كبيره وشافوا واحد طويل جدا ومحدش عرف يمسكه .. زنزانة السياسي في عنبر ١ فيها شباك كبير ٣ متر *متر ونص و بابين كبار على العنبر ومشكله الزنزانه دي ان بابها الكبير مفتوح على سخانات العنبر (السخان الحجر اللي بيطبخوا عليه) طول الوقت الزنزانة دي حر شديد خصوصا في الصيف والمراوح ما بتعملش حاجه وبيئة عظيمة لتجمع الحشرات غير ان سجن القناطر اصلا يعتبر وسط الميا والزراعات .. والعنبر دا السنه اللي فاتت وقع من سقف مدخل الحمام طوبه كبيره جدا لو كانت وقعت على حد كان مات فعلا واسوء حاجه عدم النظافة في البيئة دي .. مفيش حاجة اسمها "انتو في سجن" يبقى المفروض يكون معاهم تعابين !!!

النهارده ذكرى اول زيارة ليا في السجن .. وعرفت وقتها ان عمر كمان في السجن وبعد ما اتنقل من لاظوغلي ودوه المخابرات الحربية واتعذب واتضرب وهو مش فاهم هم بيتكلموا عن ايه وانه اتعرض على النيابة العسكرية وفهمت اني في قضية وهو في قضية.

حسبي الله ونعم الوكيل في كل من كان سبب في اللي حصلنا واللي لسه مستمر لعمر واتحكم عليه بالسجن المؤبد من ٣ اسابيع وكل ظالم عرف انه مظلوم وانه مشعارف حاجه وقالوله هتخرج ومخرجش لحد الواتي . والله العظيم ما مسامحة في كل لحظة في كل اللي حصلنا في حقنا لا في الدنيا ولا الآخرة . يارب تحصل معجزة والظلم دا يترفع يارب.

 
 
 
 

 

التعليقات
press-day.png