رئيس التحرير: خالد البلشي

Loading

أهم الأخبار

مالك عدلي يكتب عن الملف الكوميدي لليوم السابع عن تيران وصنافير: عن د. سيد المخاوي وصحافة 1150 التي اثبتت سعودية الجزر

كيف أثبتت اليوم السابع تبعية الجزر للسعودية قبل تأسيسها.. وحكاية مسئولين مصريين رفضوا مصرية الجزر منذ 850 عاما

طالب المحامي مالك عدلي جريدة اليوم السابع أن تواصل ملفها الكوميدي لإثبات سعودية تيران وصنافير، واستعرض عدلي عدد من التصريحات المضحكة التي نشرتها الجريدة حول تبعية الجزر للسعودية وتلوينها بلون المملكة قبل تأسيسها، وكذلك كيف تتبع أحد مصادرها تصريحات المسئولين المصريين منذ عام 1150 ليؤكد أن الجزر ليست مصرية.

ويأتي ملف اليوم السابع ضمن حملة حكومية لتمرير اتفاقية التنازل عن أراضي مصر في تيران وصنافير للسعودية تضمنت لقاءات مع النواب للضغط عليهم للتصويت لصالح التنازل حال عرض الاتفاقية على البرلمان.

وكانت المحكمة الإدراية العليا قد قضت بإبطال الاتفاقية في حكم نهائي وبات بإنعدامها مؤكدة أن الجزر جزء من الأرض المصرية ورغم ذلك أصرت الحكومة على إرسال الاتفاقية الباطلة والمنعدمة للبرلمان لمناقشتها.

 

وإلى نص تدوينة مالك عدلي عن الملف الكوميدي لليوم السابع:

 

ابتسامة النهارده بتقدمها لنا جريدة السوم اليابع مع الحاج السيد الحسيني رئيس الجمعية الجغرافية اللي قدم للمحكمة بتوقيعه وبختم النسر خريطة حاسمة في القضية وأشهد انها ضحكتنا وضحكت المحكمة نفسها .. عم الحاج جاب خريطة صادرة سنة 28 برضه وقال انها بتثبت تبعية الجزيرتين للسعودية ودا كان أحد أهم دلائل إن الحكومة بتضرب ورق وانهم مش بس مش شاطرين في الجغرافيا لا دول مش شاطرين في التاريخ كمان علشان سنة 1928 مينفعش يبقي فيه خريطة مكتوب عليها السعودية لأنها تأسست بعد التاربخ دا ب4 سنوات فازاي الجزيرتين يبقوا تابعين لدولة مش موجودة؟ ..

الراجل الجميل دا بقي بيقول ان خرايطنا اللي هيا من الأطلس العسكري الخاص بالقوات المسلحة المصرية ومن الأرشيفات الوطنية ف لندن وبرلين ومن هيئة المساحة المصرية خرائط لا يعتد بيها وغالبا سبب عدم اعتداده انها خرائط سليمة مش مزورة  ..مش دا المهم البرنس دا بقي رزع تصريح ملهم قال لك إيه ان من سنة 1150 مفيش مسؤول مصري قال ان الجزيرتين مصريتين طبعا دا بيقول انه مش بس عالم لا دا كمان مخاوي ومتتبع لتصريحات المسؤولين المصريين من سنة 1150 وقت مكانش فيه صحافة أصلا.

 وطبعا يا جماعة زي مانتو عارفين عبدالناصر لما قال ان تيران مصرية هوا مكانش بيتكلم بصفته مسؤول مصري وكان بيتكلم بصفته كعالم أحياء مائية وطبعا واحدة من أعلي المحاكم المصرية مش مسؤول مصري دي من وجهة نظر سعادته تعتبر فرقة راب.. وطبعا ابراهيم باشا لما دخل بالجيش المصري الحجاز نفسها مكانش مسؤول مصري دا كان رايح بصفته قائد فريق كشافة ف رحلة مدرسية .. وبنك مصر في العشرينات لما عمل شركة للصيد في المياه حول جزيرتي تيران وصنافير دا مكانش مسؤول مصري ولا مؤسسة مصرية دي كانت تبع راديو ميجا إف إم .. وطبعا السفن الحربية المصرية اللي كانت بتعمل دوريات حوالين الجزيرتين سنة 1948 مكانش بصفتهم سفن حربية مصرية دا كان بصفتها مراكب تبع شركة كوكاكولا..

وطبعا زي ما كلكم عارفين ان مدعي الوطنية اللي بيقولوا حصل معارك هناك دي ناس بتكدب.. محصلش أي معارك هناك هوا يا دوب بس قامت حرب بسيطة كده اتدمر فيها سلاح الطيران المصري وجزء كبير من معدات الجيش المصري واتقتل فيها حوالي 10000 جندي مصري واتأسر عدد تاني منهم سرية كاملة من علي حزيرة تيران علشان فيه راجل كده اسمه عبدالناصر قفل مضيق تيران ف وجه الملاحة الإسرائيلية باعتباره مضيق داخلي واقع بين ساحلين مصريين..

أتمني من جريدة السوم اليابع انها متبطلش الملف الكوميدي داه وتستمر في انها تضحكنا مع الناس الطيبة دي   #تيران_وصنافير_مصرية

 

 
التعليقات
press-day.png