رئيس التحرير: خالد البلشي

Loading

أهم الأخبار

رسالة من طارق حسين: كان نفسي أعيد معاكم.. لكن الله غالب

نشر محمود حسين، شقيق المحامي المحبوس طارق حسين الشهير بـ "طارق تيتو"، رسالة من شقيقه أخذها من خلف القضبان، وقال طارق في رسالته: "كنت أتمنى  أقضي العيد وسط الناس ولسة عندي أمل أقضيه برة إزاي معرفش وبحاول أنسى كل القهر والظام اللي شفهم".
وإلى نص الرسالة: 
إزيكم كلكم؟ وحشتوني جدا جدا..
 
في كل مكان بتنقل له بسترجع شريط ذكرياتي، بفتكر اللي حصل لي من وقت ما اتقبض علي في حبستي الأولى، ولغاية كل التعنت والتنكيل اللي بيحصل معايا في حبستي دلوقتي، ومعرفش ليه بيحصلي كدا!
 
لحد اللحظة دي لسه عندي أمل أقضي العيد بره. إزاي معرفش! 
 
لكن إذا حصل وقضيت العيد هنا، ححاول أضحك ف وش كل الناس، وححاول أنسى كل القهر والظلم اللي شفتهم. 
 
ححاول أنسى أمي اللي مقهورة علي، وأختي اللي اتفزعت لما شافتهم بيقبضوا علي، وكانت عيونهم كلها دموع وهم مش عارفين واخديني علي فين.. 
 
حنسى احتجازي في قسم الخانكة، مزنوق مع أكتر من ٥٠ واحد في حجز صغير قليل التهوية، مش عارف لا أقف ولا أقعد ولا أنام. ح انسى إهانتي وإهانة مهنتي والنقابة اللي بنتمي لها، والاعتداء علي بالضرب، واني رجعت دم. حنسى اني ممكن أفضل ألف أقسام ونيابات مصر "كعب داير" أسابيع في قضايا مش ممكن يصدق أي طفل إني ممكن يبقي لي علاقه بيها، وافضل مشحطط أهلي واصحابي ورايا.
 
حنسى واضحك. ما انا اتعلمت إن الضحك سلاح المظلومين. وحخرج وحدافع عن كل المسجونين ظلم.
 
كان نفسي أعيد بره.. بس اهو الله غالب. 
 
وحفضل على أمل إن ده يحصل واشوفكم  قريب وعلى خير. 
 
بكره تروق وتحلى.
 
طارق حسين
#الحرية_لطارق_حسين
 
التعليقات
press-day.png