رئيس التحرير: خالد البلشي

Loading

أهم الأخبار

مالك عدلي يكتب عن حبس عمرو علي في قضية جديدة بعد انهاء حبسه: بدل ما يبوس أهله وياكل من أيد أمه.. حبسوه.. حقك علينا

مالك عدلي
مالك عدلي

طالب المحامي الحقوقي مالك عدلي المحامي بمركز الحقوق الإجتماعية، بالافراج عن عمرو علي منسق 6 أبريل السابق، مشيرا إلى أنه بدلا من أن يخرج يوم الخميس الماضي للنور ويطلع عالأسفلت، ويقابل أصحابه، ويبوس عياله وياكل من إيد أمه بعد حبسه عامين، فوجئ بعد تأخير يومين بحبسه 15 يوما جديدا على ذمة قضية جديدة وهيرجع زنزانته.. حقك علينا يا عمرو"   

وكانت أسرة عمرو علي قد فوجئت بعد يومين من قضائه عقوبة الحبس سنتين في اتهامه بالتظاهر، وبدلا من إطلاق سراحه بحبسه 15 يوما في اتهامه بقضية أخرى قبل حبسه.

وقررت نيابة أمن الدولة العليا أمس حبس المنسق السابق لحركة 6 أبريل عمرو على 15 يوما على ذمة التحقيق فى القضية 473 لسنة 2014.

وقالت مصادر مطلعة – طبقا لموقع اليوم السابع- إن النيابة وجهت لعلى اتهامات تتعلق بالتحريض على التظاهر وارتكاب أعمال عنف، وانضمام لجماعة أسست على خلاف أحكام القانون والدستور، وهي نفس الاتهامات التي تم حبس عمرو بسببها في القضية التي انهى فيها عقوبته.

وعن ما تم مع عمرو كتب مالك عدالي التدوينة التالية:

عمرو علي مفروض خلصت مدة حبسه الظالمة يوم الخميس اللي فات.. كتير من حضراتكم مش ممكن يتخيل شعور ان الواحد يبقي علي وشك يطلع عالأسفلت .. يشوف وشوش غير الوشوش الكالحة اللي بيشوفها ..يمشي عالطريق.. يقابل أصحابه .. ينام ويصحي بمزاجه ..ياكل من إيد أمه.. يحضن حبيبته ..يبوس عياله من غير رقيب.. يغير الأزرق ويلبس هدوم تانية .. يحلق دقنه بمزاج .. يسمع مزيكا .. ينام علي سرير ...يفتح الشباك ويقفله بمزاجه.. الخ .. بتبقي ليلة ولا ليلة العبور وجوه الواحد أمل وفرحة ميساعهاش حاجة في الدنيا ... عمرو خروجه اتأخر يوم والتاني وفي التالت لقي نفسه معروض علي نيابة أمن الدولة ومتهم ف قضية ميعرفش عنها حاجة اسمها تحالف دعم الشرعية .. وبالرغم من انه محبوس بقاله سنتين وتلت أيام وتحت إيديهم إلا إنهم محبكش معاهم يحققوا معاه غير لما خلص مدة حبسه، وبالرغم من إن معظم إن مكانش كل المتهمين في القضية أخدوا إخلاء سبيل إلا إن عمرو لقي نفسه بيتقرر حبسه 15 يوم تاني علي ذمة التحقيق ..وضاع كل حلمه في الحرية لمدة 15 يوم تانيين وهيرجع زنزانته الكئيبة.. حقك علينا يا عمرو .. وربنا يعينك ويقويك ويثبتك ويفرغ عليك صبرا من عنده #خرجوا_عمرو_علي

وكان عمرو علي قد انهى يوم الخميس الماضي عقوبة حبسه عامين والتي قضت فيها محكمة جنح مستأنف المرج، بتخفيض الحكم من ٣ سنوات إلى سنتين. 

وكانت محكمة جنح المرج، أصدرت حكمًا في 29 فبراير 2015، بالسجن 3 سنوات لعمرو علي و3 آخرين غيابيًا،  وهم رامي مجدي وأحمد ممدوح ونجاة محمد عز وتغريم كل منهم 500 جنيه.

ووجهت النيابة العامة لعمرو علي في القضية المقيدة برقم 4549 لـسنة 2015 إدارى المرج عدة اتهامات منها "التظاهر وإثارة الشغب، ومقاومة السلطات، والانضمام لحركة أسست على خلاف أحكام القانون".

وكتبت منى سيف على حسابها على فيسبوك« عمرو علي منسق 6 ابريل كان محكوم عليه بسنتين سجن, قضاهم كاملين وكان المفروض يبقى عالأسفلت ، لكن اتنقل لأمن الدولة, ودلوقتي فوجئنا بانهم طلعوله قضية معمولة من 2014، والنيابة قررت حبسه 15 يوم، يعني أمن الدولة والنيابة صفروا العداد, وهنبتدي نعد من الأول .. ايه الجبروت ده!!!! .. الحرية لعمرو علي»

فيما كتب الناشط عمرو شعبان على صفحته «تخيل معايا كده انك مكانه اخدت حكم سنتين كل يوم انت واهلك واصحابك بتعدوا الوقت اللى فاضلك علشان تخرج لدنيا تحاول تلم شتات نفسك، وحياتك، اللى ادمرت بسبب نظام جائر ولما وقت الافراج يجى وتحضر نفسك علشان تروح، والكل فى انتظارك على الأبواب يقولولك لا لسه عندنا قضية تانية ليك، شايلنها فى الدرج من 2014 تروح عليها للنيابة، اللى تجدد حبسك 15 يوم ويراعى التجديد فى الميعاد الرسمي.. اتخيلت شكرا»

التعليقات
press-day.png